493015

Somalinin paytaxtında iki partlayış baş verib, ölən və yaralananlar var

Somalinin paytaxtı Moqadişoda törədilən iki partlayış nəticəsində 18 nəfər ölüb.

APA-nın məlumatına görə, bu barədə Reuters agentliyinə tibbi mənbələrdən bildirilib.

Məlumata əsasən, indiyədək 18 nəfər öldüyü, 20 nəfərin yaralandığı təsdiqlənib.

***

20:47

Somalinin paytaxtı Moqadişo şəhərində iki güclü partlayış olub.

APA-nın məlumatına görə, bu barədə Reuters agentliyi xəbər verib.

İlkin məlumata görə, prezident sarayı yaxınlığında terrorçu-kamikadze minalanmış avtomobili partladıb. Bundan sonra daha bir partlayış baş verib, atışma səsləri eşidilib.

Ölən və yaralananlar barədə hələ ki, məlumat verilmir.

1519363267_1

Milli Məclis toplanır – 19 məsələyə baxılacaq

Bu gün Milli Məclisin növbəti plenar iclası keçiriləcək.
AzVision.az xəbər verir ki, iclasın gündəliyinə 19 məsələ daxildir.

1. “Azərbaycan Respublikası Hökuməti ilə Türkiyə Respublikası Hökuməti arasında müdafiə sənayesi sahəsində əməkdaşlıq haqqında” Sazişin təsdiq edilməsi barədə Azərbaycan Respublikası qanununun layihəsi haqqında

2. “Azərbaycan Respublikası Hökuməti ilə Türkiyə Respublikası Hökuməti arasında təhsil sahəsində əməkdaşlıq haqqında” Sazişin təsdiq edilməsi barədə Azərbaycan Respublikası qanununun layihəsi haqqında

3. “Patent haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

4. “Əmtəə nişanları və coğrafi göstəricilər haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

5. “Uyğunluğun qiymətləndirilməsi sahəsində akkreditasiya haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

6. “Ölçmələrin vəhdətinin təmin edilməsi haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

7. “Dövlət rüsumu haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

8. “Baytarlıq haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

9. “Fitosanitar nəzarəti haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

10. “Yeyinti məhsulları haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

11. “Standartlaşdırma haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

12. “Sanitariya-epidemioloji salamatlıq haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

13. Azərbaycan Respublikasının Miqrasiya Məcəlləsində dəyişiklik edilməsi haqqında Azərbaycan Respublikası qanununun layihəsi barədə

14. “Yol hərəkəti haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

15. Azərbaycan Respublikasının İnzibati Xətalar Məcəlləsində dəyişikliklər edilməsi haqqında Azərbaycan Respublikası qanununun layihəsi barədə

16. “Azərbaycan avtomobil yolları 100 il (1918-2018)” Azərbaycan Respublikasının yubiley medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

17. “Dövlət rüsumu haqqında” Azərbaycan Respublikasının Qanununda dəyişikliklər edilməsi barədə Azərbaycan Respublikası qanununun layihəsi haqqında

18. “Standartlaşdırma haqqında” Azərbaycan Respublikası qanununun layihəsi barədə

19. “Texniki tənzimləmə haqqında” Azərbaycan Respublikası qanununun layihəsi barədə

IMG-20180223-WA0005 (1)

Xocalı soyqrımı uşaqların gözü ilə

Bədnam ermənilərin Xocalıda törətdikləri vəhşiliklər tarixin yaddaşından heç vaxt silinən deyil. Bütün şəhər sakinlərinin ev-eşiklərindən didərgin düşməsi, vəhşiliklə məhv edilməsi, müxtəlif cür istismara məruz qalması bütün dünya ölkələri tərfindən pislənilmiş, Ermənistan qaniçən və işğalçı ölkə kimi qiymətləndirilmişdir.
Belə misli görünməyən qanlı cinayət hadisəsi bütün Azərbaycan vətəndaşlarının, o cümlədən gələcəyimiz olan uşaqların da yaddaşlarından silinən deyil. Şəkildəki uşaqlar da Xocalıda soyqrımı ilə bağlı etirazlarını bildirir, gələcəkdə yağı düşmənimizə qarşı mübarizədə hər vaxt hazır olacaqlarını bildirirlər.
Belə balalrımızı Allah qorusun!

230218-06-300

Ölülərlə “danışmaq” mümkün olacaq – Qəribə texnologiya yaradılır

“İnsanın elektron surəti” sadə məişət söhbətlərini dəstəkləmək qabiliyyətinə malikdir, amma tamamilə yeni məsələlər haqda suala cavab verə bilməyəcək, çünki proqramda məlumatların yenilənməsi nəzərdə tutulmayıb.

“Qafqazinfo” ICTnews-a istinadən xəbər verir ki, isveçli proqramçılar insanlara öz mərhum qohum və tanışları ilə “ünsiyyət saxlamağa” imkan verəcək kompüter texnologiyası hazırlayır.

Konkret insanın şüurunu yenidən canlandıran və rəqəmli surətlər vasitəsilə dünyasını dəyişmiş şəxslərlə “ünsiyyət” saxlamağa imkan verən süni intellektin yaradılması ideyası bundan əvvəl “Qara güzgü” (Black Mirror) adlı elmi-fantastik serialda öz əksini tapmışdı:

“lk öncə biz müştərilərimizin dəfn mərasimlərinin təşkili haqda suallarını cavablandıran danışıq proqramı yaratdıq. Bu, bizi mərhumun səsinə oxşar səslə danışacaq “insanın elektron surəti” adlandırdığımız robotu yaratmağa sövq edib”, – deyə Stokholmda fəaliyyət göstərən “Feniks” dəfn bürosu şəbəkəsinin rəhbəri Şarlotta Runius söyləyib.

Dəfn bürosu proqramçılarla birgə ilk işlək nümunələrin yaradılması üçün 10 könüllü axtarır. Bu könüllülərin səsi onların ölümündən sonra yenidən səsləndirilmək üçün yazılacaq və proqram tərəfindən emal ediləcək.

İsveç proqramçılarının planı yalnız mərhumun danışığını imitasiya edə biləcək danışıq proqramının yaradılması ilə məhdudlaşmır. Onların növbəti addımı insanı vizual olaraq köçürəcək robot hazırlamaqdır.

ilham

Əliyevdən sosial müavinətlərlə bağlı – Sərəncam

Prezident İlham Əliyev sosial müavinətlərin məbləğinin artırılması haqqında sərəncam imzalayıb.

Məlumata görə, sosial müavinətlərin məbləği 2018-ci il martın 1-dən orta hesabla 10 faiz artırılıb.

FB1

Feysbuka qarşı kampaniya başladı

Feysbukun Fələstin siyasətinə qarşı kampaniyaya start verilib.

Dövrünnəbzi.az İQNA-ya istinadən xəbər verir ki, Feysbuk Fələstin millətini dəstəkləyən səhifə və hesabları sosial şəbəkənin qaydalarına uyğun olmaması iddiası ilə bloklayıb.

Buna etiraz edən Fələstin və dünyanın bir çox yerindən jurnalist və aktivistlər Feysbuka qarşı kampaniyaya başlayıblar. Onlar #FBfightsPalestine haştaqı ilə Feysbukun Fələstinə qarşı düşməçilik hissi bəslədiyini bütün dünyaya çatdırmağa çalışırlar.

Etirazçılar Feysbukun bu addımı ilə bağlı azad düşüncə qurumlarına şikayət etmək niyyətində olduqlarını da bildiriblər.

28279975_1982427302084927_2026366426799271527_n

Qazax Dövlət Sosial-İqtisadi Kollecində Xocalı Soyqırımı anıldı

Bu günlərdə Xocalı Soyqırımının törədilməsindən 26 il keçir. Qazax Dövlət Sosial-İqtisadi Kollecində Xocalı soyqırımında həlak olanların və bütövlükdə Azərbaycanın ərazi bütövlüyü, torpaqlarımızın azadlığı uğrunda şəhidlik zirvəsinə ucalan soydaşlarımızın əziz xatirəsini yad etmək üçün Kollecin ictimaiyyətçi tələbələrinin təşkilatçılığı ilə tədbir keçirildi.
Xocalı faciəsində və Azərbaycanın ərazi bütövlüyü uğurunda şəhid olan vətən övladlarının əziz xatirəsinin bir dəqiqəlik sükutla yad edilməsindən sonra giriş sözü ilə çıxış edən Kollecin tədris işləri üzrə direktor müavini Nicat Göyüşov Xocalının başına gətirilən dəhşətli müsibətlərdən danışdı, Xocalı hadisələrini ötən əsrin ən dəhşətli faciəsi, soyqırımı adlandırdı. O, əsrin faciəsi kimi tanınan Xocalı soyqırımında həlak olanların qanının yerdə qalmayacağına əminliyini ifadə etdi, bunun üçün isə daha da inkişaf edib, güclənmənin vacibliyini dilə gətirdi.
Nicat Göyüşov dünya arenasında Xocalı Soyqırımının tanıdılması istiqamətində görülən işlərdən də danışdı, bir çox ölkə ilə yanaşı, Amerikanın 20-dən çox ştatının Xocalı Soyqırımını tanımasını Heydər Əliyev Fondunun vitse prezidenti Leyla Əliyavanın başlatdığı “Xocalıya Ədalət” adlı kampaniyanın və xaricdəki diaspor təşkilatlarımızın uğuru kimi qiymətləndirdi. O vurğuladı ki, Azərbaycan həqiqətlərinin bundan sonra da ən nüfuzlu belnəlxalq təşkilatların tribunalarından səslənməsini təmin etmək, dünyanın super güclərinin bu həqiqətləri olduğu kimi qəbul etməsini reallaşdırmaq üçün hər birimiz dövlətimizin apardığı siyasətin yanında yer almalı, bir yumruq kimi birləşməyi bacarmalıyıq.
Daha sonra geniş məruzə ilə çıxış edən Kollecin şöbə müdiri Elvira Əfəndiyeva Xocalı soyqırımını insanlığın faciəsi adlandırdı. O vurğuladı ki, gələcəkdə bu cür faciələrin yaşanmaması üçün ötən əsrin sonlarındakı hadisələr daim yad edilməli, unudulmamalıdır.
Qazax Dövlət Sosial-İqtisadi Kollecinin “Mühasibat uçotu” ixtisasında təhsil alan tələbələri Cahan Gəncəliyeva, Səadət Nuruşova, Səbinə Nuruşova, Şamxal Əlizadə, Fəridə Həsənova, “Baytarlıq” ixtisasında təhsil alan tələbələri Akşin Əzizov, Nərmin Kərimova Xocalı Soyqırımından bəhs edən şeirlər səsləndirib, mövzu ilə bağlı fikirlərini bölüşdülər, hazırladıqları fotostendləri tədbir iştirakçılarına təqdim etdilər.
Tədbir digər çıxışçıların maraqlı fikirləri ilə davam etdi.

vesi

Vəsiqələrlə bağlı dövlət rüsumu dəyişdi

“Dövlət rüsumu haqqında” qanuna dəyişiklik edilib.

Qanuna dəyişiklik bu gün parlamentin plenar iclasında müzakirə olunub.

“Dövlət rüsumu haqqında” qanuna edilən dəyişikliyə əsasən, 15 yaşı tamam olmamış Azərbaycan vətəndaşına şəxsiyyət vəsiqəsinin verilməsinə və ya dəyişdirilməsinə görə rüsum 10 gün müddətində verildikdə və ya dəyişdirildikdə 4 manat, üç iş günü müddətində verildikdə və ya dəyişdirildikdə 20 manat, bir iş günü verildikdə və ya dəyişdirildikdə 25 manat məbləğində müəyyən edilib.

Xatırladaq ki, mövcud qanuna əsasən, 15 yaşı tamam olmamış Azərbaycan vətəndaşına şəxsiyyət vəsiqəsinin verilməsinə və ya dəyişdirilməsinə görə rüsum 10 gün müddətində verildikdə 5 manat, üç iş günü müddətində edildikdə 25 manat, bir iş günü müddətində verildikdə isə 35 manat məbləğindədir.

Qeyd edək ki, qanun layihəsi 15 yaşı tamam olmamış Azərbaycan vətəndaşına şəxsiyyət vəsiqəsinin verilməsinə və ya dəyişdirilməsinə görə qanunun 14.3-cü maddəsində nəzərdə tutulan şəxslərdən (15 yaşı tamam olmuş şəxslərdən) daha aşağı məbləğdə dövlət rüsumunun müəyyən olunması məqsədilə hazırlanıb.

Qanuna dəyişiklik 2019-cu il yanvarın 1-dən qüvvəyə minəcək.

isa

İsa Qəmbər yenidən xəstəxanaya yerləşdirildi

Milli Strateji Düşüncə Mərkəzinin rəhbəri İsa Qəmbər yenidən Mərkəzi Klinik Xəstəxanaya yerləşdirilib.

Müsavat Partiyasının mətbuat xidmətindən verilən məlumata görə, İ.Qəmbər özünü yaxşı hess edir və MKX-ya müayinəsini davam etdirmək üçün gedib.

Həkimlər İsa Qəmbərin bir neçə gün orada qalması və ürək-damar sisteminin gücləndirilməsi ilə bağlı tibbi prosedurlardan keçməsini tövsiyyə ediblər.

Onu da qeyd edək ki, sabah İ.Qəmbərin 61 yaşı tamam olur.

ilham

Beşdən çox uşağı olan qadınlara verilən müavinət artırıldı

Azərbaycan prezidenti İlham Əliyev beşdən çox uşağı olan qadınlara verilən müavinətin məbləğinin artırılması haqqında sərəncam imzalayıb.

Məlumata görə, prezidentin “Beşdən çox uşağı olan qadınlara müavinətin məbləğinin müəyyən edilməsi haqqında” 2013-cü il 27 dekabr tarixli fərmanı ilə müəyyən edilmiş müavinətin məbləği 2018-ci il martın 1-dən 10 faiz artırılıb.

Daha tez məlumatlanmaq üçün yeni Facebook səhifəmizi

01 (1)

“Biz bu tarixi irsə çox diqqətlə yanaşırıq” – Mehriban Əliyeva

Birinci vitse-prezident Mehriban Əliyeva İranın Mədəniyyət və İslami Əlaqələr Təşkilatının sədri Abuzər İbrahimi Türkamanı qəbul edib.

Dövrünnəbzi.az xəbər verir ki, M. Əliyeva Azərbaycanla İran arasında mövcud olan dostluq və qardaşlıq münasibətlərinin xalqlarımızın əsrlər boyu malik olduğu mədəni, tarixi bağlantılara söykəndiyini qeyd edib. “Biz bu tarixi və mədəni irsə çox diqqətlə yanaşırıq”, – deyən Birinci vitse-prezident bu gün dövlətlər və xalqlarımız səviyyəsində qarşılıqlı hörmətə və dostluğa əsaslanan əlaqələrin yaradılmasından məmnunluğunu ifadə edib.

Mehriban Əliyeva keçən il İranda Azərbaycan mədəniyyət günlərinin, həmçinin 2017-ci ildə ölkəmizdə elan olunmuş “İslam Həmrəyliyi İli” çərçivəsində “Azərbaycan İslam mədəniyyətinin incisidir” adlı fotosərginin uğurla keçirilməsinin mədəniyyət sahəsində əməkdaşlığın genişləndirilməsi baxımından önəmini qeyd edib. O, İranın mədəniyyət günlərinin də ölkəmizdə yüksək səviyyədə təşkil olunacağına əminliyini ifadə edərək bu səfərin də uğurlu olacağına əminliyini bildirib.

Ötən il Azərbaycan Respublikasının İranda mədəniyyət günlərinin ən yüksək səviyyədə keçirilməsi üçün İran tərəfinin bütün səylərini əsirgəmədiyini deyən Abuzər İbrahimi Türkaman Azərbaycan tərəfinin ölkəmizdə İran kinosu günlərinin təşkil olunması üçün hər cür şərait yaratmasını yüksək qiymətləndirib.

Görüşdə bu il Naxçıvanın İslam mədəniyyəti, öz növbəsində, Təbrizin İslam turizmi paytaxtları elan olunması ilə bağlı əməkdaşlıq məsələləri müzakirə edilib, mədəniyyət və turizm sahəsində müxtəlif layihələrin həyata keçirilməsi üçün yaxşı imkanların olduğu bildirilib.

01

“Manqal”da soyunduraraq döyüblər – Film kimi cinayət

Bakı Ağır Cinayətlər Məhkəməsində qətldə təqsirləndirilən Xəyal Paşayev, Kənan Həsənov, Bilal Bayramov, Allahverdi Ruszpeykar, Məhəmməd Əhmədovun cinayət işi üzrə məhkəmə başlayıb.

“Qafqazinfo”nun verdiyi xəbərə görə, hakim Azər Paşayevin icraatında olan prosesdə baxış iclası keçirilib.

Prokuror ittiham aktını elan edib. Belə ki, X.Paşayev bir qrup şəxslə İran vətəndaşı Bəşir Qəhramaninin şəriki olmuş Valeh Nəcəfovu oğurlayaraq onu hədələməkdə təqsirləndirilir. Valehdən Bəşirə olan 31 min dollar pulunu geri qaytarmasını tələb ediblər. Valehi oğurlayaraq “Manqal” restoranına gətirib, orada onu soyunduraraq döyüblər.

Ailə üzvlərinə və yaxınlarına işgəncə verəcəklərini deyərək onu hədələyiblər. V.Nəcəfov onlarla razılaşıb və həyat yoldaşına məxsus qızılları verəcəyini deyib. Birlikdə evə gedərək evdən 15 min manat dəyəri olan qızıl zinət əşyaları götürüblər. Daha sonra pulun qalan hissəsini də hədə-qorxu ilə tələb ediblər. Pulu vermədikdə isə Nəcəfovu yenidən görüşə çağıraraq onu döyüblər. Bu dəfə V.Nəcəfov silaha əl atıb, lakin dəstə üzvləri tapançanı ondan alıblar. Mübahisə zamanı atəş açılıb və Valeh başından yaralanıb, oradaca vəfat edib.

İttihama münasibət bildirən X.Paşayev özünü qismən təqsirli bildiyini deyib: “Mən sadəcə borcumu istəmişəm. Özüm 3 güllə yarası almışam”.

Digər təqsirləndirilənlər özlərini təqsirli bilmədiklərini deyiblər.

Məhkəmədə mərhum V.Nəcəfovun həyat yoldaşı Yeganə Nəcəfova ifadə verib. O deyib ki, əri iranlı Bəşir adlı şəxslə birgə biznes qurub və Rusiyaya göyərti göndəriblər: “Bir dəfə Valehin işi vardı, özü gedə bilmədi. Mal da xaab çıxmışdı, buna görə aralarında 30 min manatla bağlı mübahisə olmuşdu. Sonra bir gün evə gəlib dedi ki, şəriki Bəşir onu Xırdalan uşaqlarına sifariş edib. Mən dedim ki, polisə şikayət edək. O dedi sən arvadsan, kişi işinə qarışma, onlar məni ailəmlə hədələyirlər. Bir dəfə gəlib mənim qızıllarımı apardı ki, onlara versin. Amma ucuz qiymətləndirmişdilər, dedi öz zərgərimə aparacam. Bir neçə gün sonra yenə görüşə getdi, zəng elədim telefonu açan olmadı. Bir neçə saat sonra zəng edəndə bir nəfər telefonu açıb dedi ki, Valehin qəzada ayağı sınıb. Xəstəxanaya getdik, orada bildik ki, Valeh ölüb.

Yoldaşımın silahı olmayıb, heç vaxt da üstündə silah görməmişəm. Onu soyundurub döydüklərini bilirdim. Başına gətirilənləri mənə danışmışdı, iyrənc hərəkətlər ediblər, ona işgəncə veriblər, bir daha xatırlamaq istəmirəm”.

İttihama görə, 2017-ci ildə Xırdalan şəhərində baş verən silahlı atışmada 1970-ci il təvəllüdlü Nəcəfov Valeh Ərzağa oğlu başından güllələnərək qətlə yetirilib. Hadisə zamanı digər bir şəxs – 1985-ci il təvəllüdlü Qəbələ sakini Paşayev Xəyal Oqtay oğlu isə üç güllə yarası ilə 1 saylı Kliniki Tibbi Mərkəzə aparılıb. O, qarın və qol nahiyələrindən yaralanıb, həyatını xilas etmək mümkün olub. Daha sonra Xəyal Paşayev, Kənan Həsənov, Bilal Bayramov, Allahverdi Ruszpeykar və Məhəmməd Əhmədov saxlanılıb və barələrində həbs qətimkan tədbiri seçilib.

arif

Bakıda bu film yayımdan qaldırıldı – Söyüşə görə

Fevralın 21-də premyerası baş tutan “Güləhməd” filmi kinoteatrlarda yayımdan qaldırılıb. “Qafqazinfo” xəbər verir ki, xalq artisti Arif Quliyev, Əjdər Zeynalov, Natiq Fərzəliyev, aktyor Rəşad Vahidzadə, aktrisa Firəngiz Orucovanın rol aldığı komediya janrında çəkilən filmin afişalardan yığışdırılması barədə baş prodüser Vüqar Cavadov göstəriş verib.

Cəmi bir gün tamaşaçı qarşısına çıxan ekran işində qeyri-etik ifadələr işlədilib, söyüşlərdən istifadə olunub. Baş prodüser bu səbəbdən belə addım atıb. O, xəbərçi.az-a açıqlama verərək filmin rejissoru Metin Yüceli ittiham edib:

“Metin Yücelin bu işini sıfır səviyyəsində qiymətləndirirəm və filmə baxan hər kəsdən üzr istəyirəm. Sadəcə bərbad və plagiat ssenari (“Gülcamal” filinin oğurlanmış versiyası ) idi. Bundan əlavə rejissor şəxsi maraqlarından dolayı Gülnaz obrazının filmdəki səhnələrini artırmaqla filmi bu günə qoydu. Bir sözlə hər şeydən bezdik, zərər etsək belə xalqımıza bu cür filmə baxmağı layiq bilmədik”.

Layihənin yayımını həyata keçirən “Park Cinema”da baş prodüserin istəyi ilə belə addım atdıqlarını bildiriblər:

“Biz baş prodüserin istəyi ilə filmi yayımdan qaldırmışıq. Ekran işində həm vulqar ifadələrdən çox istifadə olunmuşdu, həm də texniki problemlər çox idi”.

1494945140-5608

Gələn il Azərbaycanda parlament seçkisi olacaq – İddia

Azərbaycanda prezident seçkilərindən sonra parlament seçkiləri də irəli çəkilə bilər.

Bu haqda məlumatı “Yeni Müsavat” yayıb. Qəzet bildirir ki, Milli Məclis üzvlərinin yeni seçimi 2019-cu ildə baş tutacaq. Növbədənkənar parlament seçkilərinin gələn il keçirilməsi gözlənilən bələdiyyə seçkiləri ilə eyni vaxta salınması nəzərdə tutulur. Bununla həm də seçki prosesinə çəkilən xərclərin azaldılmasının hədəfləndiyi bildirilir.

Azərbaycan müxalifəti üçün parlament seçkilərinin irəli çəkiləcəyi gözlənilən variantdır. ADP sədri Sərdar Cəlaloğlu hesab edir ki, Azərbaycan Konstitusiyasına edilən dəyişikliklərdən sonra Milli Məclisin yenidən formalaşdırılması bir zərurətə çevrilib: “Yeni konstitusiyaya uyğun olaraq yeni parlament seçilməlidir. Çünki indiki parlamentin fəaliyyəti ilə yeni konstitusiya arasında ziddiyyət var. Yəni Milli Məclis indi qeyri-qanuni fəaliyyət göstərir”.

Partiya sədrinin fikrincə, yeni parlament seçkiləri növbədənkənar prezident seçkiləri ilə eyni vaxtda keçirilsə, daha yaxşı olardı: “2019-cu ilədək gözləməyə ehtiyac yoxdur, yeni parlamen seçkiləri ən qısa müddətdə keçirilməliydi. Daha yaxşı olardı ki, prezident seçkiləri ilə eyni vaxtda salınsın. Amma salınmadı, heç olmasa prezident seçkilərindən dərhal sonraya təyin olunmalıdır”.

Vətəndaş və İnkişaf Partiyasının sədri Əli Əliyev də hesab edir ki, növbədənkənar parlament seçkiləri gələn ilə saxlanmamalıdır: “Düşünürəm ki, bələdiyyə seçkilərinə qədər gözlənməyəcək, elə bu ilin payızında yeni parlament seçkiləri keçiriləcək”.

Milli Məclisin üzvü, Böyük Quruluş Partiyasının sədri Fazil Qəzənfəroğlu isə hesab edir ki, parlament seçkilərinin irəli çəkilməsi üçün zərurət yaradacaq əsas yoxdur: “Düzdür, belə bir qərarın olacağını istisna etmirəm. Ola bilər, çoxluğun iradəsi ilə belə qərar qəbul olunsun. Amma hesab edirəm ki, bu, zəruri addım olmayacaq”.

narkotik

Səfirlikdə 400 kiloqram narkotik aşkarlandı

Buenos-Ayres beynəlxalq hava limanında keçirilmiş xüsusi əməliyyat zamanı rus əsilli argentinalı polis əməkdaşı İvan Bliznyük saxlanılıb.

Dövrünnəbzi.az APA-ya istinadən xəbər verir ki, İ.Bliznyük Rusiyanın Argentinadakı səfirliyi vasitəsi ilə kokainin Moskvaya göndərilmə kanalının yaradılmasında əlaqəli olmaqda şübhəli bilinir. Məlumata görə, səfirlik ilə sıx əlaqəsi olan Bliznyuk güc strukturlarının əməkdaşları üçün təhsil proqramlarının təşkili məqsədi ilə mütəmadi olaraq Rusiyaya səfər edib. Onunla birlikdə Aleksandr Çikalo adlı şəxs də saxlanılıb.

Məlumata görə, hər iki ölkəni əhatə etmiş birgə əməliyyat bir ildən çox davam edib.

“Todo Noticias” bildirir ki, 2016-cı ilin dekabrında Rusiyanın Argentinadakı səfirliyində 400 kq-dək kokain aşkarlanıb. Məlumata görə, Rusiyanın Argentinadakı səfiri polisə zəng edərək səfirliyin kollecində narkotik vasitələrin aşkarlandığını bildirib. Məlum olub ki, narkotiklərlə dolu 12 çamadanı binaya iyul ayında səfirliyin sabiq əməkdaşı gətirib.

KİV-lərin məlumatına görə, qeyd olunan narkotrafiklə həmçinin Əli Abyanov adlı səfirliyin mühasibi də əlaqəli olub. Məhz onun narkotiklə dolu çamadanları səfirliyin kollecinə gətirdiyi bildirilir. Mütəşəkkil cinayətkar qrupun rəhbəri olduğu ehtimal edilən şərti adı “Mister K” olan daha bir şəxs istintaqdan yayınıb.

Telefon danışıqlarının dinlənilməsi zamanı narkotikin Rusiya və Avropaya göndəriləcəyi müəyyən edilib.

İstintaqın nəticəsi olaraq, Rusiyada üç, Argentinada isə iki nəfər saxlanılıb.

quql-sultanehmed

Quqlu kəşf edən Osmanlı Sultanı – Foto

Quqldan ilk istifadə edən, kəşf edən şəxs Osmanlı Sultanı II Əbdülhəmid olub.

Kult.az xəbər verir ki, bu sözləri türkiyəli professor Əbubəkir Sofuoğlu deyib.

“Quqlu istifadə edən, ilk kəşf edən Sultan Əbdülhəmiddir. Gedə bilmir, getmək imkanı yoxdur, getsə paytaxtda problemlər yarana bilər. Həmin yerlərdən fotolar çəkdirib oranı izləyir. Oradan bir ideya yaradır. Bu mənada Quqlu ilk kəşf edən Sultan Əbdülhəmid xandır”, – professor bildirib.

Xatırladaq ki, Sultan II Əbdülhəmid – Osmanlı İmperiyasının 34-cü sultanı (1876-1909) və 113-cü islam xəlifəsidir.

127390

Bəxtiyar Vahabzadənin həyat yoldaşı vəfat edib

Xalq şairi Bəxtiyar Vahabzadənin həyat yoldaşı Dilarə Vahabzadə vəfat edib.

Enter.News xəbər verir ki, Dilarə Vahabzadə bu gün səhər saatlarında həyatını itirib.

Vida mərasimi bu gün Təzə Pir məscidində keçiriləcək.

ssri-bayraq

Rusların “çekist” və “keqebeşnik” sevgisi artdı

Rusların SSRİ dövrünün xüsusi xidmət orqanlarına qarşı münasibəti son 20 ildə dəyişib.

Axar.az xəbər verir ki, bu barədə informasiyanı “Levada Çentr” şirkəti yayıb. Şirkətin keçirdiyi sorğuya əsasən, rusların yalnız 12%-i SSRİ-nin ilk xüsusi xidmət orqanı olan Ümumrusiya Fövqəladə Komissiyasının (VÇK) siyasi terror və repressiyalarla məşğul olduğunu bildirib. Bu fikri müdafiə edənlərin sayı 1997-ci illə müqayisədə 11% azalıb. Bu qurumun cinayətkarlıqla mübarizə apardığını düşünənlərin sayı isə 28%-dən 42%-ə qalxıb.

Rusların Dövlət Təhlükəsizlik Komitəsinə (KQB) də münasibəti dəyişib. Belə ki, respondentlərin 41%-i DTK-nın dövlətin maraqlarını müdafiə etdiyini bildirib. Bu tip düşünən rusların sayında əvvəlki dövrlə müqayisədə 19% artım olub. DTK-nın repressiyalarla məşğul olduğunu düşünənlərin sayı 22%-dən 17%-ə düşüb.

Qeyd edək ki, Ümumrusiya Fövqəladə Komissiyası 1917-ci ildə yaradılıb. Qurumun əsas məqsədi əks-inqilab və sabotajın qarşısını almaq olub. Komissiyaya yarandığı gündən Feliks Dzerjinski rəhbərlik edib. Onun beş illik fəaliyyəti dövründə (1917-1922-ci illər) qırmızı terror tam geniş şəkildə həyata keçirilib. Komissiya təkcə bu dövr ərzində 140 min insan barədə güllənmə əmri çıxarıb. Bu qurum sonradan ləğv edilərək NKVD-nin tərkibinə daxil edilib. Məhz Fövqəladə Komissiyası (ÇK) sayəsində sonradan casus mənasını ifadə edən “çekist” sözü yaranıb.

Bu komissiyanın fəaliyyəti ucbatından Azərbaycan Xalq Cümhuriyyəti dövrünün müxtəlif rütbəli yüzlərlə hərbçisi (o cümlədən generallar) və siyasətçisi güllələnib, eləcə də sui-qəsdə məruz qalıb.

1519356904_1

Komitə sədrinin maşını belə park edildi, qalmaqal yarandı

Bir neçə sosial şəbəkə istifadəçisi tərəfindən Komitə rəhbərliyinin avtomobilinin guya pandusun üzərindən çıxarılaraq Komitə binasının qarşısında saxlanılması barədə qeyri-dəqiq məlumat yayılıb.

Axar.az xəbər verir ki. bu barədə Diasporla İş üzrə Dövlət Komitəsinin mətbuat katibi Elşad Miraləmin yaydığı açıqlamada bildirilib. E.Miraləm qeyd edib ki, avtomobili pandusun üzərindən çıxarılmayıb, bu heç fiziki baxımdan mümkün də deyil:

“Avtomobil o hündürlükdə pandusun üzərinə necə qaldırmaq olar? Fotoya bir də diqqətlə baxın, xahiş edirəm. Binanın qarşısında Dövlət Komitəsinə gələn rəsmi qonaqların, nümayəndə heyətlərinin, eyni zamanda Komitə rəhbərliyinin avtomobillərinin binaya yaxınlaşması üçün xüsusi yer var. Təqdim olunan fotolarda bu aydın görünür. Komitəyə gələn xarici qonaqların, xüsusilə rəsmi şəxslərin təhlükəsizliyi üçün bu imkan yaradılıb. Yəqin hər kəs razılaşar ki, yüksək səviyyəli rəsmi şəxsləri nəqliyyatın hərəkətinin intensiv olduğu bir ərazidə, yolun ortasında avtomobildən düşürmək nəinki protokol qaydalarına ziddir, həm də təhlükəsizlik baxımından yolverilməzdir. Avtomobil Komitənin qarşısına pandusun üzərindən deyil, fotoda göründüyü kimi xeyli irəlidən çıxarılıb. Sadəcə sürücünün səhvi odur ki, avtomobili pandusun qarşısında və səkinin üzərində saxlamamalıydı. Bununla bağlı da sürücüyə xəbərdarlıq olunub. Məsələ bu qədər sadədir”.

f42961ab2dbf0629fa75b40bf9264d20

Bu gün Anatoli Banişevskinin doğum günüdür

Bu gün “Neftçi”nin əfsanəvi futbolçusu Anatoli Banişevskinin doğum günündən 72 il ötür. Apasport.az klubun saytına istinadən xəbər verir ki, 1946-cı ilin fevralın 23-də Bakıda anadan olan Banişevski “ağ-qaralar”ın heyətində (1964-1973, 1975-1978) SSRİ çempionatlarında 288 oyunda 121 qol, SSRİ kuboklarında isə 30 oyunda 15 qol vurub.

1966-cı ildə “Neftçi” ilə SSRİ çempionatının, SSRİ yığması ilə dünya çempionatının bürünc, 1972-ci ildə isə Avropa çempionatının gümüş medalını qazanıb. SSRİ yığmasında ən çox oyun keçirmiş (49 oyun) və fərqlənmiş (19 qol) “Neftçi”li “Marakana” stadionunda Braziliyanın qapısına qol vurmuş ilk sovet futbolçusudu.

SSRİ-nin əməkdar idman ustası və Qriqori Fedotov klubunun üzvü olan Banişevski daha sonra “Neftçi”də (1981-1982) məşqçi, Mingəçevirin “Avtomobilçi” klubunda (1984-1987), Burkina-Fasonun gənclər yığmasında (1987-1988) və “Kəpəz”də (1988) baş məşqçi kimi çalışıb. Afrika ölkəsində işlədiyi zamanı ağır xəstəliyə tutulan Banişevski 1997-ci il dekabrın 9-da 51 yaşında vəfat edib. Banişevski ölümündən bir il əvvəl “Şöhrət ordeni” ilə təltif olunub.

“Neftçi”yə sədaqətini heç vaxt itirməyən “9 nömrə” azarkeşlərin yaddaşında əbədi olaraq qalacaq.

5530059442-9a4d89edea

ABŞ Konqres üzvü 20 Yanvar və Xocalı faciəsinin ildönümü ilə bağlı bəyanatla çıxış edib

ABŞ-ın Nyu Cersi ştatını təmsil edən demokrat Konqres üzvü Donald Peyn 20 Yanvar və Xocalı faciələrinin ildönümü ilə bağlı bəyanatla çıxış edərək bu faciələrdə həyatını itirmiş insanların xatirəsini yad edib.

Azərbaycanın ABŞ-dakı səfirliyindən APA-ya verilən xəbərə görə, ABŞ Konqres üzvü Peyn bəyanatında 1991-ci ildə müstəqilliyini bəyan edən Azərbaycanın paytaxtı Bakı şəhərinə Sovet hökumətinin 1990-cı ilin 20 yanvar tarixində qoşun yeridərək çoxsaylı insanın həyatına son qoyduğunu vurğulayıb.

Konqres üzvü həmçinin Xocalıda həlak olmuş insanların xatirəsini yad edərək, həyatını itirmiş şəxslərin xatirəsinin əbədiləşdirilməli olduğunu qeyd edib.

Konqres üzvü sonda planetimizdə azadlıq uğrunda müharibələrdə həlak olmuş bütün insanların ABŞ Konqresi tərəfindən ehtiramla yad edilməli olduğunu vurğulayıb.

gorusds

Putin müdafiə nazirləri ilə görüşdü

Rusiya prezidenti Vladimir Putin Kreml Dövlət Sarayında təşkil olunan təntənəli gecədə bir neçə ölkənin müdafiə naziri ilə görüşüb

Kremlin mətbuat xidmətinin verdiyi xəbərə görə, 23 Fevral – Vətən Müdafiəçisi Günü münasibəti ilə təşkil olunan təntənəli tədbirdə Azərbaycan, Venesuela, Qazaxıstan, Qətər, Monqolustan, Serbiya, Özbəkistan, Belarus, Qırğızıstan və Ermənistanın Müdafiə Nazirlliklərinin yüksək vəzifəli nümayəndələri iştirak edib.

Tədbirdə Azərbaycanı müdafiə nazirinin müavini Kərim Vəliyev təmsil edir. (APA)

1455711296-finland_education_getty_0

Bakıda müəllim şagirdin açıq-saçıq şəklini yaydı – Araşdırma başlanıldı

Nərimanov rayonunda yerləşən 82 saylı orta məktəbin şagirdlərindən birinin valideyni polisə şikayət edib.

Belə ki, Nərimanov Rayon Polis İdarəsinin 17-ci Polis Bölməsinə müraciət edən C.Ş. (şərtidir) bu məktəbdə təhsil alan yeniyetmə qızının açıq-saçıq görüntülərinin yayıldığını bildirib. C.Ş. şikayətində bu məsələdə qızının Ə. (şərtidir) adlı qadın müəlliminin əli olduğunu qeyd edib. Polis faktla bağlı araşdırmalara başlayıb.

Modern.az saytı məsələ ilə bağlı Bakı şəhəri Təhsil İdarəsinə müraciət edib.

İdarədən bildiriblər ki, Bakı Şəhəri üzrə Təhsil İdarəsi tərəfindən paytaxtdakı tam orta məktəblərdən birində qeydə alınmış məsələ ilə bağlı şagirdlər arasında müvafiq profilaktik işlər görülüb, məktəbdə təlim-tərbiyə prosesinin təkmilləşdirilməsi və pedaqoji heyətin fəaliyyətinin müvafiq tələblərə tam uyğunlaşdırılması istiqamətində zəruri tədbirlər həyata keçirilib.

Məktəbin bir şagirdinin (müvafiq səbəblərə görə şagirdin adı qeyd olunmur) ona aid olduğu güman edilən açıq-saçıq fotoşəkillərinin yayılmasını nəzərə alaraq, İdarəyə təqdim olunan fotoşəkil və materiallar araşdırılmaq üçün hüquq-mühafizə orqanlarına təqdim olunub.

BŞTİ-nin əməkdaşları, məktəb psixoloqu və müəllimlər də məsələ ilə bağlı cəlb olunub. Problemin həllində uşaqların psixoloji zərər görməməsi əsas amil kimi diqqət mərkəzində saxlanılır. Kütləvi İnformasiya Vasitələri nümayəndələrindən azyaşlıların mənafeyinin qorunması baxımından məsələnin həssaslığını nəzərə almaları xahiş olunur.

01jpg (1)

Naxçıvanda Süni Mayalanma Mərkəzi yaradılır – Prezident 3 milyon manat ayırdı

Prezident İlham Əliyev Naxçıvan Muxtar Respublikasında heyvandarlığın inkişafı ilə bağlı əlavə tədbirlər haqqında sərəncam imzalayıb.

Məlumata görə, Süni Mayalanma Mərkəzinin yaradılması işlərinin həyata keçirilməsi məqsədi ilə Azərbaycan Respublikası Prezidentinin 2018-ci il 22 yanvar tarixli 3593 nömrəli Sərəncamı ilə təsdiq edilmiş “Azərbaycan Respublikasının 2018-ci il dövlət büdcəsində dövlət əsaslı vəsait qoyuluşu (investisiya xərcləri) üçün nəzərdə tutulan vəsaitin bölgüsü”nün 1.31.2-ci yarımbəndində göstərilmiş məbləğin 3,0 (üç) milyon manatı Naxçıvan Muxtar Respublikasının Nazirlər Kabinetinə ayrılıb.

riza-640x360

Zərrabın vəkillərindən gözlənilməz addım

ABŞ-da həbsdə olan tanınmış biznesmen Rza Zərrabın vəkilləri gözlənilməz qərar alıblar.

“Qafqazinfo” xarici KİV-ə istinadən xəbər verir ki, iş adamının vəkilləri Şeyma Yıldırım və Aytən Yılmaz istefa veriblər.

Məlumat üçün bildirək ki, R.Zərrab Türkiyədə olduğu zamanlarda onu təhqir edənlərə qarşı məhkəməyə müraciət etmişdi. Məhkəmə proseslərində Zərrabın hüquq müdafiəçiləri Ş.Yıldırım və A.Yılmaz idi.

Qeyd edək ki, korrupsiya və rüşvətxorluqda ittiham edilən biznesmen iki ildir ABŞ-da həbsdədir.

ilham

Dövlət başçısı Bruney sultanını təbrik edib

Prezident İlham Əliyev Bruney-Darüssalamın Sultanı Hacı Həssənal Bolkiaha təbrik məktubu ünvanlayıb.

Məlumata görə, təbrikdə deyilir:

“Bruney-Darüssalamın milli bayramı münasibətilə Sizi və Sizin simanızda bütün xalqınızı öz adımdan və Azərbaycan xalqı adından ürəkdən təbrik edirəm.
İnanıram ki, Azərbaycan ilə Bruney arasındakı dostluq və əməkdaşlıq münasibətləri xalqlarımızın mənafelərinə uyğun olaraq bundan sonra da inkişaf edəcək və genişlənəcəkdir.

Bu əlamətdar gündə Sizə möhkəm cansağlığı və xoşbəxtlik, dost xalqınıza daim sülh və rifah diləyirəm”.

1519321889_1

Rusiyanın məhvi PLANI HAZIRDIR – Ruslar xilas olmağın mümkünsüzlüyünü ETİRAF ETDİ

“ABŞ, Rusiyadan fərqli olaraq, ani qlobal zərbə konsepsiyası çərçivəsində kosmik məkandan hərbi hədəflər üçün istifadə üzrə layihələrə malikdir”.

Teref.info publika.az-a istinadən xəbər verir ki, bunu ABŞ prezidentinin milli təhlükəsizlik üzrə köməkçisi Herbert Makmasterin fikirlərini şərh edən “Vətən Arsenalı” jurnalının kommersiya direktoru, hərbi ekspert Aleksey Leonkov deyib.

“Rusiya kosmosun hərbiləşdirilməsinə qarşı amerikalılara müqavilə təklif edirdi. Müqavilə Antarktida kimi silahsız sahələr statusunun kosmos üçün də möhkəmləndirilməsini nəzərdə tuturdu. Amma amerikalılar bu müqavilənin bir çox müddəaları ilə razı deyillər. Rusiya hələ ki kosmosun hərbiləşdirilməsi üzrə proqramlar həyata keçirmir. Amerikalılardan fərqli olaraq, Rusiya belə hazırlıq aparmır. ABŞ-da ani qlobal zərbə konsepsiyası çərçivəsində kosmosun hərbiləşdirilməsinin bir neçə layihəsi var”, – Leonkov deyib.

Onun sözlərinə görə, ABŞ Yer kürəsinə “Allahın əsası” ilə kosmosdan ani zərbənin vurulmasını planlaşdırır:

“ABŞ orbitə elə aparatları çıxarmaq istəyir ki, Yer kürəsinə “Allahın əsası” adlı sərtgövdəli ərintilərdən ibarət oxlar ata bilsin. Onlar hesablayırlar ki, əgər bu oxları yaşayış məntəqələri, məsələn, Moskva kimi şəhərlərə atsalar, onlar saniyədə yeddi kilometrə qədər sürətlə uçacaqlar və kinetik zərbə alınacaq. Bu halda, nüvə partlayışından fərqli olaraq, heç bir ionlaşdırıcı yoluxma olmayacaq, amma genişmiqyaslı dağıntılar olacaq. Aydındır ki, belə oxları vurmaq praktik olaraq mümkün deyil, çünki dünyada hava hücumundan müdafiə sistemləri hələ heç bir meteoridi vurmayıb”.

O əlavə edib ki, amerikalılar orbitə çıxarılacaq avia-kosmik sistemlər üzərində işləyirlər. Leonkov qeyd edib ki, raket hücumu haqqında xəbərdarlıq sisteminin köməyi ilə belə sistemi qeydə almaq kifayət qədər çətindir.

Xatırladaq ki, ABŞ Milli Kosmik Şurasının iclasında çıxış edən Herbert Makmasterin sözlərinə görə, ABŞ kosmik müdafiənin maliyyələşdirilməsini artırır. Prezidentin köməkçisi qeyd edib ki, ABŞ kosmosda müharibə istəmir, amma bu müharibəyə hər zaman hazır olmalıdır: “Kosmos artıq yer, dəniz və hava kimi hərbi domen olub. Biz konflikti kosmosa daşımaq istəmirik, amma əgər burada savaş yaşansa, ABŞ buna hazır olacaq. Kosmosda gərginlik ABŞ-ın düşmənləri ucbatından artır”, – o bildirib.

Makmaster konkret ölkələrin adlarını çəkməyib, amma ABŞ daha əvvəllər bəyan edib ki, Çin və Rusiya kosmosun hərbi istifadəsi üzrə səyləri artırır.

Makmaster qeyd edib ki, ABŞ prezidenti tərəfindən təklif edilmiş 2019-cu il maliyyə ilində kosmik müdafiə imkanlarının maliyyələşdirilməsinin artırılması üçün 1 milyard, sonrakı beş ildə isə 8 milyard dolların ayrılması nəzərdə tutulur.

Qeyd edək ki, kosmik məkanın hərbiləşdirməsi 1967-ci il tarixli beynəlxalq müqavilə ilə qadağan edilib.

elesger

Dəhşətli tədqiqat: Ələsgərin sünnəti hardadır?

Açığı, məni fikir götürüb: nə edəcəyik, necə yaşayacağıq Aşıq Ələsgərin yaşını bilmədən?! Neçə gündür özümə gələ bilmirəm, dərin sarsıntı içindəyəm.

Bu işi belə qoymaq olmaz. Məncə, dövlət büdcəsindən bu işə 2-3 milyard pul ayırmaq lazımdır, alimlərimiz təcili, təxirə salınmadan beynəlxalq təşkilatların dəstəyi ilə Ələsgərin dəfn olunduğu Ağkilsəyə getməlidirlər. Gedib Ağkilsədə Ələsgər rəhmətliyin qəbrini açmaq, onun sümüyündən analiz götürmək, dünyanın bütün elmi mərkəzlərinə göndərmək (hamısının da pulunu verməliyik) və beləliklə, Ələsgərin dəqiq yaşını öyrənmək nəinki lazım, Azərbaycan üçün həyati vacib bir məsələdir!

Alimlərimiz görkəmli aşığın yaşının üstündə bir-birilərini yüngülvari təhqir də ediblər. Yetməz. Necə olub axı, onlardan biri digərinin başına qaz açarı ilə zərbələr endirməyib? Necə olub ki, o alimlərdən biri baş dərisinin kəsilmiş, deşilmiş, cırılmış, yırtılmış, sırtılmış yaraları ilə xəstəxanaya çatdırılmayıb?!

Alimlərimiz elmə niyə bu qədər barmaqarası yanaşır? Niyə Rusiya Dövlət Arxivinə göndərilən təkrar müraciətdə bu alimlər bir-birini baqaja qoyandan sonra biri digərinə (Nazir Əhmədli öz həmkarlarına) yalnız “şarlatan” deməklə kifayətlənməlidir?

Bu, elə taleyüklü məsələdir ki, burda 7 mərtəbəli nəsil-nəcabət söyüşlərindən istifadə etmək, nəinki rus, ingilis, fransız, hətta erməni alimə yazılan məktubda öz aliminin son dərəcə savadsız, kütbeyin, qanmaz olduğunu sübut etmək çox önəmlidir! Bu yanaşmalar Azərbaycan elminə, aliminə dəhşətli dərəcədə şan-şöhrət gətirən məsələlərdir, unutmaq olmaz!

Dünya alimləri Marsda həyat axtarır, artıq ölümsüzlüyü kəşf etməyə yaxındırlar. Başa düşmürəm, Ələsgərin yaşını tapmamış bizim Marsda nə itimiz azıb?

Nazir Əhmədlinin kitabının erməni mənbələrinə istinadən hazırlandığı deyilir. Məlumata görə, kitabda tanınmış aşıqların doğum tarixləri saxtalaşdırılıb və bununla Qərbi Azərbaycanda türklərin tarixinin elə də dərin olmadığı iddiası ortaya qoyulub.

İndi o boyda Azərbaycan tarixi bir Aşıq Ələsgərin ümidinə qalıbsa, demək, bu alimlər bilir də nə edir.

Təklif edirəm ki, alimlərimiz nəinki Aşıq Ələsgərin yaşını, hətta onun sünnət olunduğu tarixi də müəyyən etsinlər. Əsas məsələlərdən biri də Ələsgərin “alətinin” nə zaman kəsilməsidir. Biz mütləq müəyyən etməliyik ki, onun “alətinin” kəsintisi Ağkilsənin hansı istiqamətinə və necə atılıb: elə-belə, yerdən fırladıblar, yoxsa qolaylayıb atıblar. Və o kəsinti saniyədə neçə metr sürətlə hərəkət edib.

Elm budur! Ələsgərin o məlum kəsintisi təxminən nüvə texnolojisi kimi bir şeydir. Onu tapsaq haa, erməni alimləri hamısı əlini yerə qoyub, Qarabağ iddiasından əl çəkəcək, erməni əsgərləri silahı atıb gedəcək…

Elmimizin qarşıdakı 100 il üçün strateji hədəfi mütləq bu olmalıdır: yaxın 100 ildə Ələsgərin yaşını, sonrakı yüz ildə onun sünnətini tapmalıyıq!

Haydı, möhtəşəm alimlərimiz, Ələsgərin sünnətinə doğru irəli!

1519283682_1

Gültəkin Hacıbəylinin dəyəri milyonlarla ölçülən mülkləri – 5 illik deputatlıq dövründə mənimsənilən hektarlarla torpaq, villalar, mənzillərin siyahısı

Milli Şuranın Koordinasiya Mərkəzinin üzvü Gültəkin Hacıbəyli vaxtilə Milli Məclisin deputatı olarkən yol verdiyi qanunsuzluqlarla növbəti dəfə gündəmə gəlib. Qadın həddindən artıq çox əsəbidir və onun deputat imtiyazlarından istifadə edərək, qanunsuz şəkildə ələ keçirdiyi mülkləri xatırladanları lənətləyir, söyür, təhdid edir…

Görünür, Hacıbəyli xromosomun daxili hissələrindən birinin 180 dərəcə dönməsi nəticəsində quruluşunun dəyişməsi kimi bir proses yaşayır. Bu onun ağılına da təsirsiz ötüşmür. Bunun nəticəsində də deputatlıq dövründə hər addımda təhqir etdiyi, marginal qrupa çevrilmiş müxalifətçilərlə yan-yana dayanıb. Lakin təkcə bu da səbəb deyil. Hacıbəyli deputat imtiyazını itirib, bununla yanaşı, onun gəncliyi də günü-gündən solur. Görünür, bunları anlayan Hacıbəyli məhz bu səbəbdən çox hikkəlidir, narazıdır. Bu səbəbdən də deputat olduğu dönəmdə onun Mehdiabad qəsəbəsindəki “Əlillər” massivindən qanunsuz olaraq 12 sot torpaq sahəsini ələ keçirməsini faktlarla sübuta yetirən Bütöv Azərbaycan Xalq Cəbhəsi Partiyasının sədr müavini Niyaməddin Orduxanlını açıq şəkildə təhdid edir.

Məsələ çox sadədir. Avropa.info xəbər verir ki, BAXCP sədrinin müavini Niyaməddin Orduxanlı facebook səhifəsində Gültəkin Hacıbəylinin deputat olduğu dövrdə Mehdiabad qəsəbəsindəki “Əlillər” massivindən qanunsuz olaraq 12 sot torpaq sahəsini mənimsədiyini yazıb. Özü də Hacibəyli bunu əlil olmaya-olmaya edib. Həmin vaxt Orduxanlı Mehdiabad bələdiyyəsinin sədr müavini olub və adam qanunsuzluqlara şəxsən şahid olub. Hacıbəyli isə əlillərə ayrılan 12 sot torpaq sahəsini ələ keçirməklə kifayətlənmir, deputat imtiyazından qanunsuz şəkildə istifadə edən qadın əldə etdiyi torpağın qonşuluğunda yaşamış 1-ci qrup əlil Vüqar Süleymanovun da ərazisinin bir hissəsini ələ keçirir. Bu gün Milli Şura adlı marginal qrupda oturub səfeh bəyanatlarla gündəmə gələn Hacıbəyli deputat olduğu dövrdə törətdiyi qanunsuzluqları çığır-bağırla, söyüşlə təkzib etməyə çalışsa da, faktlar başqa şey deyir.

Avropa.info saytı çox qısa bir araşdırma nəticəsində Gültəkin Hacıbəylinin qanunsuz yollarla ələ keçirdiyi və dəyəri milyonlarla ölçülən mülklərə sahib olduğunu üzə çıxarıb. İndi sadalayacağımız mülklərin siyahısını görən oxucu Gültəkin Hacıbəylinin məşhur bir iş adamı olduğunu düşünməsin. Hacıbəyli cəmi 5 il deputat olub və bu 5 ildə onun qanunsuz olaraq ələ keçirdiyi mülklərin siyahısı, sadəcə, dodaq uçuqladır. İndi bu qadın 5 il deyil, 15 il deputat olsaydı, nələr edərdi? Çox uzatmadan keçək Hacıbəylinin deputat olduğu dövrdə ələ keçirdiyi mülklərin siyahısına:

– Goranboy rayonu, Xan Qərvənd kəndində 92 sotluq torpaq sahəsi və onun üzərində yerləşən 400 kv. metr sahəsi olan nəhəng villa

-Abşeron rayonu , Xırdalan şəhərində 60 sot torpaq sahəsi

-Goradil kəndində 30 sot torpaq sahəsi

-Abşeron rayonu, Mehdiabad qəsəbəsində hər biri 4 sot olmaqla 3 yerdə topaq sahəsi

-Abşeron rayonu, Mehdiabad qəsəbəsində 6 sot torpaq sahəsi

-Şamaxı rayonu, Qalebuğurd kəndində 12 sot torpaq sahəsi

-Səbail rayonu, Şeyx Şamil küçəsində ofis

-Bakı şəhəri, Nəsimi rayonu, Dilarə Əliyeva küçəsi, ev 251 a ünvanında 178,18 kv. metr sahəsi olan mənzil

– Bakı şəhəri, Nəsimi rayonu, Dilarə Əliyeva küçəsi, ev 251 A ünvanında 179,14 kv metr sahəsi olan digər mənzil

– Bakı şəhəri, Yasamal rayonu, İnşaatçılar prospekti, ev 12/26 ünvanında 63,3 kv metr sahəsi olan mənzil

-Bakı şəhəri, Səbail rayonu, Mehdi Hüseyn küçəsi 61, ev 2 ünvanında mənzil

-Bakı şəhəri , Nəsimi rayonu , Səməd Vurğun küçəsi, ev 92 A ünvanında mənzil

Hələ bu harasıdır? Bu gün “məmur özbaşnalığına, qanunsuzluğa və korrupsiyaya qarşı mübarizənin qadın simvolu”na çevrilməyə iddialı olan Gültəkin Hacıbəyli 5 il deputatı olduğu Goranboy rayonunda qanunsuz olaraq hektarlarla torpaq sahələrini zəbt edib. Hacıbəylinin Göranboyda ələ keçirdiyi torpaq sahələrinə nəzər yetirin:

-Goranboy rayonu, Nadirkənd kəndində 5 hektar

-Goranboy rayonu, Borsunlu kəndində 6,25 hektar

-Goranboy rayonu, Aşağı Ağcakənd kəndində 1,76 hektar

– Goranboy şəhəri 58-ci məhəllədə hər biri 8 sot olmaqla 2 torpaq sahəsi

Gültəkin Hacıbəyli bütün bu torpaq sahələrini 5 il deputatı olduğu rayonda yaşayan yerli sakinlərin hüquqlarını pozaraq, qanunsuz şəkildə ələ keçirmişdi. Bu qadın hektarlarla torpağı bu gün guya “müdafiə etdiyini” iddia etdiyi həmin o insanların nalələrinə əhəmiyyət verməyərək zəbt etmişdi. Lakin yaxşı ki, Goranboy sakinlərinin çoxsaylı şikayətləri cavabsız qalmadı və sosial ədalət bərpa olundu.

Yazının əvvəlində də qeyd etdiyimiz kimi, Gültəkin Hacıbəyli çox hikkəlidir. Bir tərəfdən deputatlıq imtiyazının əldən çıxması, digər tərəfdən geridə qalan gənclik… Bu yandan da Gornaboy sakinlərinin Hacıbəylinin onlara məxsus hektarlarla torpağı mənimsəməsi ilə bağlı çoxsaylı şikayətləri cavabsız qalmayınca və sosial ədalət bərpa olununca, Gültəkin bütün hikkəsi ilə marginal müxalifətin yanına qaçdı. Bəli, Gültəkin Hacıbəylini müxalifətin düşərgəsinə gətirən məhz həmin o sosial ədalətin bərpa olunması idi.

1519276656_4

Vitse-prezidentin bir ili – deputatlar Mehriban Əliyevadan danışdılar

Azərbaycanda birinci vitse-prezident təyinatından bir il ötdü. Heydər Əliyev Fondunun prezidenti, UNESCO-nun və ISESCO-nun xoşməramlı səfiri, ölkənin birinci xanımı Mehriban Əliyevanın vitse-prezident olduğu bir il ərzində onun fəaliyyəti ilə bağlı mövqelər birmənalıdır

Hər kəs vitse-prezident postunun yaradılmasını və bu posta M.Əliyevanın təyinat almasını yüksək dəyərləndirir, son bir ildə onun Azərbaycan üçün mühüm işlər gördüyünü, gələcəkdə də uğurlu fəaliyyətinin davam edəcəyini düşünür.

Deputat Zahid Oruc vitse-prezidentin fəaliyyətinin bir ilini yüksək dəyərləndirdi: “Hələ Azərbaycanda 90-cı illərdə prezidentlik postu yaradılanda bu postun ciddi fəaliyyətini görmürdük, ölkədə xaos baş alıb gedirdi. O zamanlar Avropada fəaliyyət göstərən bu postu Azərbaycanda görə bilmirdik. Prezidentlərin həyatına diqqət etsəniz xatırlamazsınız ki, sözügedən şəxslərin özləri ilə bərabər xanımları da dövlət yükünün altına çiyinlərini versinlər. Ulu öndərin həyat yoldaşı Zərifə Əliyevanın vaxtsız həyatdan getməsi ilə qeyd etdiniz institutu biz o zamanlar da görə bilmirdik. Mehriban xanımın timsalında Azərbaycanda Şərq qadınının yeni bir obrazını gördük.

Zahid Oruc: “Azərbaycanda Şərq qadınının yeni bir obrazını gördük”

Bu bir tərəfdən də dövlət başçısının fəaliyyətini tamamlayan bir təyinat oldu. Azərbaycan qadınına münasibəti yetərincə yüksək səviyyəyə qaldırdı. İdarəetmədə bu post mühüm rol oynayır. İlham Əliyev-Mehriban Əliyeva cütlüyü ailə modeli olaraq cəmiyyətimizə təsir göstərdi. Əslində bu posta təyinat zamanı müxtəlif dairələrdən reaksiyası gəldi və Azərbaycan cəmiyyətinin bu təyinata reaksiya çox yüksək oldu, bunu onun konstitusion, doğal haqqı kimi dəyərləndirdi. Prezidentin həyat yoldaşı olmaq bu məsələdə mane olmamalı idi, olmadı da. Məcburi köçkünlərimizin yaşamasını təmin edəcək layihələrə dəstək verilməsi çox mühüm addım idi və düşünürəm ki, bu özünü göstərdi. İnsanlar ən çətin durumda olduqları vaxt ilk olaraq ağıllarına Heydər Əliyev Fondu və bunun rəhbəri Mehriban xanım gəlir. Mehriban xanım xeyirxahlıq və kömək simvolu kimi görünür. Sosial, humanitar yönlü işlərdən əlavə, ən önəmlisi mənim anlamımda o oldu ki, prezidentlik postunun daha dayanıqlı olması üçün, eləcə də ölkənin gələcək həyatına bağlı müxtəlif situasiyalardan Azərbaycan daha yaxşı özünü qorumaq üçün vitse-prezidentlər institutunun yaradılması çox mühüm rol oynadı. Mən bunu siyasi tərəflərini digər amillərdən önə qoyuram. Etiraf etmək lazımdır ki, 27 il müstəqil olan dövlətlərin daha dayanıqlı, oturuşması zaman alan dövrdür. Xəyal quranlar, müxtəlif ssenarilər hazırlayanlar var idi. Bunlar kimlərisə başqa ssenarilər hazırlamağa vadar edə bilərdi. Bu cəhətdən Mehriban xanımın missiyası əvəzolunmazdır. Onun fəaliyyəti çox uğurludur. Buna siyasi deyil, bir qədər loyal mövqedən yanaşma göstərəndə dediyiniz həqiqəti bölüşməliyik”.

Fərəc Quliyev: “Seçkilərdən sonra bu post özünü daha ciddi şəkildə doğruldacaq”

Milli Dirçəliş Hərəkatı Partiyasının sədri, deputat Fərəc Quliyev M.Əliyevanın bu posta təyinat almasından əvvəllər onun fəaliyyətinin göz önündə olduğunu söylədi: “Hər zaman ciddi fəaliyyətdə olub, xüsusilə humanitar sahələrdə. Bir neçə qanun layihəsi ilə çıxış edib. Amnistiya aktının qəbulunun təşəbbüskarıdır. Azərbaycan mədəniyyətinin tanıdılması ilə bağlı da böyük işlər görüb. Vitse-prezident təyin olunmamışdan əvvəl bir sıra işlər başlatmışdı ki, son bir ildə bunları davam etdirdi. Bu post ona bir sıra işləri görmək üçün daha geniş imkanlar açdı. Hesab edirəm ki, vitse-prezidentlər postunun yaradılması ölkə prezidentinin işlərini asanlaşdıran amillərdən biri oldu. Düşünürəm ki, 11 apreldəki prezident seçkilərindən sonra bu post özünü daha ciddi şəkildə doğruldacaq”.

Tahir Kərimli: “Vitse-prezidentin mənfi tərəflərini görə bilmirəm”

Vəhdət Partiyasının sədri, deputat Tahir Kərimli hesab edir ki, vitse-prezidentlər postunun yaradılması ilk növbədə, dövlətin və hakimiyyətin dayanıqlı olması üçün baza yaratdı: “Bununla mənəvi, siyasi hüquqi baza yaradıldı. Bir sıra ölkələr kimi bizdə də hakimiyyət dəyişikliyinin müxtəlif üsulları axtarıla bilərdi. Bildiyiniz kimi, bizim hakimiyyət olan AXC dövründə prezident olmayanda onu Milli Məclisin rəhbəri əvəz edirdi. Sonralar baş nazir ikinci pilləyə keçdi. Fors-major olduğu vəziyyətlərdə bu amillər çox asanlıqla hakimiyyət dəyişikliyinə səbəb ola bilərdi. Nəticədə kimlərinsə qanunsuz hakimiyyəti ələ keçirməsinə şərait yarana bilərdi. Amma vitse-prezidentlik institutu yaradılandan sonra artıq hər kəsə məlumdur ki, bu indi mümkün deyil. Hakimiyyətin konstitusion, struktural möhkəmliyi var. Yəni hər hansı bir yüksək vəzifədə olmaqla hakimiyyəti mənimsəmək mümkün deyil. Bu baxımdan Azərbaycanda hakimiyyətin mənimsənilməsi məsələsi arxa plana keçdi. Vitse-prezident bizdə sosial yöndə də çox mühüm işlər görür. Bu istiqamətdə də ciddi irəliləyişlər var. İdarəetmədə də vitse-prezidentin müstəsna rol oynadığını əminliklə söyləyə bilərik. Eyni zamanda, xarici siyasətdə də vitse-prezident fəaldır. Azərbaycan mədəniyyətinin və digər sahələrin dünyada tanıdılmasında da Mehriban Əliyevanın rolu ortadadır. Bunun üstünlüklərini görürəm. Hələ ki vitse-prezidentin mənfi tərəflərini görə bilmirəm. Amma bu o demək deyil ki, biz hakimiyyətin strategiyasını müdafiə edirik. Mənfiliklər görmürəmsə, necə deyə bilərəm ki. Bir halda ki ölkəmizdə bu institut var, o zaman hökumət daxilində də bəzi islahatların aparılmasına ehtiyac görünür. İlk növbədə, paralellik aradan qaldırılmalıdır. Güman edirəm ki, yeni seçiləcək prezident bu məsələlərə gedəcək. Paralelliyin aradan qaldırılması çevik idarəetməni təmin edir. Lənglik yaradan strukturların aradan qaldırılmasına çox böyük ehtiyac var. Buna da inanıram ki, belə bir islahatlar prezident seçkilərindən sonra mütləq keçiriləcək”.

Diqqət!!!
Saytda olan bütün şərhlərə görə rəhbərlik heç bir məsuliyyət daşımır!
Dovrunnabzi.az İnformasiya Portalı
Baş redaktor: İlham Hacalı
Bizimlə əlaqə: (055) 540-19-33
info@devrinnebzi.com

Copyright © 2013-2018 | Bütün hüquqlar qorunur! Tərtib etdi: Ə.Rzayev