Cavid Qurbanov zəbt etdiyi əraziyə görə kompensasiya vermir – Foto

1403622291

“Azəryolservis” ASC-nin sifarişi ilə Bakı-Şamaxı yolunun 80-ci kilometrliyində çəkilən yol bir vətəndaşın başına dərd açıb.

 

Verilən məlumata görə, Qobustan rayonunun Ceyrankeçməz kəndində yol çəkilişinə görə Rafiq Məmmədovun həyəti zəbt olunub, evi isə yaşayış üçün yararsız vəziyyətə düşüb. 

 

Bu ərazidə 4 zolaqlı yol çəkildiyi və genişləndirildiyi üçün R.Məmmədovun  yaşadığı evin həyəti plana salınıb. Mülk sahibinin evi qanuni tikilidir və sənədləşdirilib.

 

Ancaq vətəndaşın zəbt edilən həyətinə və yaşayış üçün yararsız hala salınan evinə görə “Azəryolservis” ASC tərəfindən nə ona kompensasiya verilir, nə də ərazini tərk etməsi tələb edilir. Vətəndaşın həyəti çəkilən yolun gözünə qatılıb, evi şosse yolun kölgəsində itib-batıb, ona isə heç bir izahat verilməyib.

 

R.Məmmədov sənədlə aldığı torpağın böyük hissəsinin “Azəryolservis” tərəfindən zəbt edilməsinə görə ona heç bir xəbərdarlıq edilmədiyini deyir.

 

Xatırladaq ki, yaşayış evinin tikintisinə yalnız magistral yoldan qanunla müəyyən edilmiş məsafədə yerləşdiyi halda icazə verilir. Rafiq Məmmədov da icra hakimiyyətindən tormağını o şərtlərlə alıb və 25 il əvvəl yaşayış evi tikib. Hazırda isə onun həyəti magistral yolun genişlənməsi səbəbindən zəbt olunub,həyətinin hasarı dağıdılıb, evi isə yolun bir addımlığına düşüb. Şosse yolda baş verən arzulanmaz qəzanın R.Məmmədovun həyatını cəhənnəmə çevirəcəyi istisna deyil. Onu bu vəziyyətdə yaşamağa vadar edən “Azəryolservis” ASC-nin yerli podratçısı isə əvvəlcə hər şeyin nəzərə alındığını şifahi şəkildə bildirsə də, sonradan kompensasiyadan birmənalı imtina edib.

 

“Azeryolservis” ASC-nin mətbuat xidmətinin rəhbəri Pünhan Mürsəliyev  açıqlamada bildirdi ki, ASC həmin ərazidən keçən yolun tikintisi ilə məşğul olan qurumla məsələni dəqiqləşdirdikdən sonra açıqlama verə bilər.

 

Qeyd edək ki, ASC rəhbəri Cavid Qurbanov Bakıda Ziya Bünyadov prospektinin genişləndiriləcəyi yol üstündəki tikililərin söküləcəyi halda kompensasiya ödəniləcəyini açıqlamışdı. ASC rəhbəri nədənsə analoji addımı Ceyrankeçməzdə atmaq istəmir.

 

 

Share to Facebook
Share to Odnoklassniki

Şərh yaz

Diqqət!!!
Saytda olan bütün şərhlərə görə rəhbərlik heç bir məsuliyyət daşımır!
Devrinnebzi.com İnformasiya Portalı
Baş redaktor: İlham Hacalı
Bizimlə əlaqə: (055) 540-19-33
info@devrinnebzi.com

Copyright © 2013-2018 | Bütün hüquqlar qorunur! Tərtib etdi: Ə.Rzayev